التسويق مش خطة طارئة نعملها في الأزمات أو المواسم ونوقفها، التسويق بيبدأ من وقت تأسيس المشروع ويكمل معاك لحد نهاية عمر مشروعك..

في وقت الأزمات المفروض تقرب أكتر من عميلك وتشوف احتياجاته وطلباته إيه، وهل منتجك حيحل مشكلة عنده في الوقت ده ولا لأ..

على سبيل المثال شركة أيكيا في بداية أزمة كوڤيد ١٩ عرفت ان عملائها كلهم كانوا بيعملوا شغلهم من البيت وعليه وجهت كل حملاتها التسويقية في الاتجاه ده وبدأت تظهر منتجات زي المكاتب الصغيرة والكراسي المريحة لأن مش كل الناس عندها مكان مخصص للعمل في بيوتهم..

من ناحية تانية المدارس اللي أجبرت على نقل العملية التعليمية كلها أون لاين بدأت تعمل دروس توعوية لأولياء الأمور والطلاب تعرفهم فيها بطرق استعمال منصات مختلفة عشان يقدروا يقدموا الخدمة على اكمل وجه..

طبعاً مش حنتكلم على الفرص اللي ظهرت في الأزمة زي خدمات تطبيقات الموبايل والويب سايت والشحن بأشكاله والترفيه المنزلي بأشكاله..

أما في حالة إن الخدمة اللي بتقدمها لعميلك صعب تقديمها عن بعد فلازم تخليك برضه قريب من العميل وتفضل قدام عينيه وتقدم له مثلاً نصايح وتوجيهات عامة في مجالك عشان لما تخلص الأزمة يفضل فاكرك ومقدر انك كنت جمبه وقت شدته..

لو في حاجة مش واضحة عرفوني وقولولي تحبوا نتكلم عن إيه في البوستات الجاية…

تحياتي لكم..