ليه كلمة السعر عالخاص أو السعر انبوكس معادتش تنفع اليومين دول في الإعلانات على وسائل التواصل الاجتماعي؟
ببساطة ممكن نلخص الموضوع في النقط دي:
1- العملاء مش بتحب الغموض وكون انك مش بتقول السعر قدام الناس ده بيعزز الغموض وهل انت بتبيعلي البضاعة بنفس السعر اللي بتقوله للناس التانية؟
2- الناس بصفة عامة صبرها بقى قليل وعملائك المستهدفين على السوشال ميديا اذا افترضنا انك استهدفتهم صح، مش مستحمليين انهم يقعدوا عالبوست كتير، فانجز وقول السعر.
3- لما متقولش السعر سيادتك بتزود الخطوات اللي العميل المحتمل بيعملها عشان يشتري، ولسه قايل لك الناس معندهاش خلق.. (كومنت السعر كام؟ وبعدها السعر انبوكس، وبعدها اسأل تاني في الإنبوكس واستنى لما حد فاضي يرد عليا، كده أكون انا اشتريت من مكان تاني خلاص).. عالسوشال ميديا الناس بتقضي وقت لطيف فحاول وانت بتبيع حاجة للناس في الوقت اللطيف ده تقصر الخطوات والوقت بقدر الإمكان عشان متحولش الإعلان بتاعك لكومة من الكومنتات من غير فائدة..
لو في حاجة مش واضحة عرفوني وقولولي تحبوا نتكلم عن إيه في البوستات الجاية…
تحياتي ليكم..
