من شوية توفي رجل الأعمال محمود العربي مؤسس وصاحب مجموعة توشيبا العربي، تقريبًا مفيش بيت حتدخله إلا لما حتلاقي فيه لوجو مكتوب عليه “توشيبا العربي”..

لما قريت سيرة الراجل ده حسيت قد إيه هو فعلاً شخص خلوق وكريم ومعندهوش حد للعطاء، وقد ايه كان رحيم وأب للناس اللي بتشتغل في شركاته، واللي بيعتبرهم أبناءه قبل مايكونوا موظفين عنده! وكان بيقول ديمًا: “مفيش حاجة اسمها بيشتغل عندنا، اسمها بيشتغل معانا، الناس دي ربنا سخرنا لهم وسخرهم لنا”

دلوقتي بقيت على قناعة إن مش شرط الطبقة العليا يكونوا كلهم حرامية ونصابين وبتوع مصلحتهم، بعيد عن كمية النجاحات اللى حققها الراجل ده والطريقة اللى سلكها عشان يوصل مشروعه واللى غيرت مفهوم البيزنس بشكل عام عند ناس كتيرة، عايز أقول بس إني تقريبًا مشوفتش رجل أعمال سيرته طيبة زيه قبل ما يموت وبعد ما يموت، وحرفيًا ده المعنى الحقيقي لكلمة “السيرة الطيبة هى اللى بتدوم!”

وبقيت متأكد إن أي إنسان يقدر يكسب الدُنيا والآخرة، ومفيش تعارض ابدًا بين الإخلاص والتدين والغنى والإنسانية.
الله يرحمه يارب رحمة واسعة ويصبر أبناءه وكل شخص كان هو سبب بعد ربنا في إنه يفتح بيت ويكمل مستقبله وحياته…