كوكاكولا من الشركات اللي بتدور على استمرارية النجاح عشان كده قسم التسويق عندهم شغال مش بينام..
الفريق ده عمل دراسة للسوق وشاف العميل بيشتكي من إيه ورجع له بالحل في شكل حملة تسويقية من أجمل الحملات في الفترة الحالية:
كوكاكولا شافت ان في عملاء قلقانين من نظافة مكان الشرب ودائما لما بيشتروا كولا بيمسحوا بمنديل علشان يطمنوا نسبيا انه نظيف.. وقدمت الحل في شكل تغليف إضافي للعلبة من مكان الشرب..
الشركة عرفت المشكلة (تسويق)..
فكروا في حل للمشكلة (تسويق)
لقوا علاج للمشكلة بالتعاون مع قسم الإنتاج (تسويق)
نفذوا ووصلوا رسالتهم للعميل بشكل حلو وشيك (تسويق)
العميل حس بالطمأنينة والأمان (تسويق)
وكده زادت قيمة العلامة التجارية (تسويق)
برافو كوكاكولا

اللي فات ده كان تبسيط لمفهوم في التسويق اسمه (مركزية العميل – Customer Centricity)

ولو شركتك اتبعته فعلا حتتحول خلال فترة بسيطة من مجرد المنافسة في السوق الى قيادة السوق..

لو في حاجة مش واضحة عرفوني وقولولي تحبوا نتكلم عن إيه في البوستات الجاية…
تحياتي ليكم..