حكايتي
من بائع بسيط سنة 1999 إلى استشاري متخصص في مجال التسويق العقاري في دبي – رحلة 26 سنة مليانة شغف وتجارب وتعلم مستمر.
حكايتي بدأت بخطوة صغيرة كمساعد بائع، وبفضل الله وصلت لمكان ما كنتش أتخيله. كنت دايمًا حريص أتعلم وأطبق اللي باتعلمه في شغلي، وأتأكد إن كل يوم بيضيف لي حاجة جديدة. لحد ما ركّزت شغفي وخبرتي في دبي… المدينة اللي مش بترضى غير بالصفوة. هنا هشاركك قصتي والدروس اللي فرقت معايا، يمكن تلاقي فيها حاجة تساعدك في مشوارك.
الشرارة الأولى: لحظة غيرت مساري
في سنة 1999، كنت طالب في جامعة إسكندرية - كلية التجارة. في محاضرة تسويق، دخل الدكتور المحاضر (أستاذي الدكتور إسماعيل السيد) ماسك في إيده نسخة من جريدة الأهرام. فتحها على إعلان لشركة دايو موتورز، كان فيه صورة لعربيتهم الجديدة "دايو ماتيز". قعدنا نتناقش عن الإعلان ده، والتفاعل ده غير تفكيري تمامًا. كانت دي أول مرة أشوف دكتور جامعي بيربط العلم بالواقع، وده أثر فيا بشكل كبير.
منهجيتي للنجاح: 4 ركائز أساسية في الإدارة والتسويق
العميل أولا وأخيرا:
رحلتك تبدأ من عند العميل وتنتهي عنده. لازم تفهم احتياجاته وطلباته بدقة، وتقدم له خدمة أو منتج مفصل ليه كأنه معمول مخصوص عشانه. الأهم هو إنك تتأكد من رضاه، وتاخد ملاحظاته، وتحل أي مشكلة ممكن تقابله.
الإدارة بالأهداف:
ده أكتر مبدأ إداري أنا مؤمن بيه. أساسه إننا نركز على النتائج النهائية أكتر من تركيزنا على الخطوات الروتينية. مش لازم تكون روتيني وممل عشان تبقى مسيطر؛ خليك مرن وخلي النتائج هي اللي تتكلم عنك.
بناء فريق عمل قوي:
فريقك هو الأساس للإدارة الصحيحة والتسويق الناجح. لازم كل كلمة وتصرف من أعضاء الفريق تمشي في نفس اتجاه الشركة وتوجهاتها. وكل واحد فيهم لازم يعرف مهامه ومسؤولياته بوضوح. تذكر دايمًا: الموظف الراضي يساوي أكتر من عميل راضي. تخيل بقى أهمية الفريق المسؤول عن صورة شركتك قدام عملائك؟
الابتكار والتطوير السريع والمستمر:
في سوق عمره ما بينام زي سوق دبي، لازم تكون دايمًا سابق منافسيك. لازم تقدم منتجات وخدمات جديدة ومبتكرة تلبي احتياجات عملائك المتغيرة. وده بيتحقق عن طريق تشجيع فريقك على البحث عن الأفكار الجديدة، ودورك كمدير إنك توفر الموارد اللازمة للبحث والتطوير ده.
خلاصة 26 عامًا: شريكك لاستثمار عقاري آمن في دبي
ودلوقتي، بخبرة متراكمة من 26 سنة، ونجاح تطبيق الاستراتيجية اللي كلمتك عنها في أكتر من دولة وأكتر من نشاط - كان أهمهم الاستثمار العقاري في سوق دبي اللي اكتسبت فيه خبرة عميقة على مدار سنين طويلة - أقدر أقول لك إني بتوفيق الله هعلمك إزاي تختار مشروع يحقق لك ربح محترم على استثمارك، والأهم إنه يكون بأقل نسبة مخاطر عشان توصل لـالحرية المالية في دبي في أقرب وقت بإذن الله.
تابعني عشان أكيد هتلاقي هنا معلومة تفيدك في حل أي مشكلة، وأكيد يشرفني إننا نتعاون مع بعض لتحقيق أهدافك.