أيوة، انت شوفت الصورة مزبوط، خليك بسيط بغباوة وهات بوسة! لكن للأسف انا حاصدمك لما اقولك ان دي مش الKISS اللي في بالك ولا الموضوع ليه دخل عشان النهاردة عيد الحب خالص..

قاعدة KISS هي اختصار ل:

Keep It Simple Stupid

ومعناها الحرفي “خلي الموضوع بسيط وغبي أو بسيط لدرجة الغباوة”

القاعدة دي طلعها مهندس إسمه “كيلي جونسون” أيام الحرب العالمية الثانية عشان يعلم فريقه إن البساطة حاجة مريحة ودايما كسبانة.

بتوع الجرافيك والديكور قالوا إن القاعدة دي تخصهم، لكن الحقيقة إن القاعدة دي من أروع القواعد اللي بتنظم وتسهل كل شغل البيزنس وبالذات في التصميم والتخطيط للمشاريع الجديدة.

“خليك بسيط ومفهوم حتى للشخص الغبي”

وطبق بقى انت السطر ده على أي فكرة (مشروع، إعلان، تصميم، تسعيرة، منيو) وأي حاجة جوه البيزنس بتاعك.

واتخيل انها لو معقدة ومش واضحة، هل حتحقق اللي أنت عايزه؟

شوف الأمثلة دي وانت تفهمني:

• عرض بيقولك “اشتري ثالث قطعة بخصم ٣٥٪ بشرط أن يكون سعر الأولى والثانية ١٠٠ دولار”، أنا شخصياً دوخت والعميل محتاج يدخل عليك بألة حاسبة. ماتقول ياسيدي كوبون خصم بقيمة ٥٠ دولار عند شراء ٣ قطع وتخلصنا..

• لما توصف لحد عنوان شركتك وتقول له جمب محل حسنين اللي عنده كل حاجة بدولارين، مع ان اليافطة صغيرة ومش واضحة مع إن قبل باب شركتك محطة بنزين تسد عين الشمس..

جرب بقى القاعدة دي من أول الفكرة لغاية أخر حتة في التنفيذ بَسط على نفسك توصل أسرع، بسط على زبونك يفهمك أسرع.

ده كان شرح بسيط للقاعدة، اتمنى يكون سهل وواضح واتمنى اكون افدتك..