من كام يوم سيرفر شركة فيس بوك اتعطل وبالتالي اتعطلت كل الخدمات اللي الناس متعودة تاخدها من الشركة (فيس بوك وماسنجر وانستاجرام وواتس آب)..

والناس اللي بتستعمل الخدمات دي حرفياً مصالحهم اتعطلت ومبقوش عارفين يعملوا إيه عشان يتواصلوا مع عملائهم..
طيب اللي حصل حصل ولازم نتعلم من اخطائنا والموقف ده يخلينا نعيد تفكيرنا وترتيب أولويتنا من جديد عشان لو حصل أي حاجة زي دي مستقبلاً منخسرش قاعدة العملاء الحاليين والمستقبليين بتاعتنا..

نعمل إيه بقى؟؟

هنا حقولكم على كذا حل ممكنين لأكتر من مستوى في البزنس، لو تقدروا عليهم كلهم خير وبركة ولو متقدروش ابدأوا باللي تقدروا عليه..

١) دائما بقول ان الويب سايت هو الدكان بتاعك يعني زي ما بتفتح دكان أو مقر لشركتك في الشارع وبتهتم بديكوره وموقعه وريحته لازم يكون ليك ويب سايت سهل الوصول ليه والناس عارفاه.. ولازم كمان يكون همك الشاغل هو تحويل كل عملائك من السوشال ميديا عموماً الى الويب سايت عشان يعرفوا كل جديد عنك وعن خدماتك..

٢) الإيميل اللي حالياً الناس بتهمله ودائما بيفترضوا ان العملاء مش بتفتحه ولا بتبص عليه.. اعملوا بس حاجة ليها قيمة وخلوها حصرا عالايميل وتتكرر كل فترة وياريت متكونش طويلة عشان لما عميلك يشوف التنبيه بوصول الايميل يروح يفتحه فوراً..

٣) التواصل مع العملاء ليه كذا طريقة ممكن نستعملها زي تيليجرام المهدور حقه وبرامج تانية زي ڤايبر وبوتيم وطبعاً مننساش المكالمات العادية والرسائل النصية القصيرة العادية برضه..

٤) التواصل وترتيب مهام الفريق الأفضل تتعمل ببرامج متخصصة لكده زي تريللو و سلاك ومونداي وواحد من اصدقائي رشحلي برنامج اسمه أسانا بس لسه مجربتهوش..
Trello – Slack – Monday – Asana

٥) البرامج والتطبيقات مفتوحة المصدر منتشرة بشكل كبير وممكن تاخدوها وتركبوها على سيرڤراتكم الخاصة وبكدة يبقى مفيش حد ليه سلطة عليكم..

في النهاية حابب أأكد بس على فكرة بسيطة .. زمان كان اصحاب المشاريع بيعملوا اعلانات في الشوارع عشان الناس تعرف مكان المشروع واللي باحب دائماً اسميه الدكان، دلوقتي الدكان بتاعك بقى الويب سايت والبديل النسبي لإعلانات الشوارع هو السوشال ميديا..
ابدأ بالتغيير دلوقتي وابدأ بالموجود ومتستناش الوضع المثالي وشوف النتيجة بعد ٦ شهور..
بالتوفيق..